إزاي تحدد تكلفة تشطيب شقتك؟ أهم العوامل اللي بتأثر على السعر
بعد مبتستلم شقتك سواء تمليك ايجار بتيجي لأهم مرحلة و هي تشطيب شقتك، التشطيب مش بس شكل المكان بعد التشطيب لا ده بيتأثر و بيأثر علي ميزانتيك، و ده الي هنساعدك فيه بحيث ايه الي بيتحكم في سعر التشطيب في كل بند.
1- مساحة الشقة
مساحة الشقة هي أول حاجه بيقف عليها تكلفة التشطيب، بمعني كل ما زادت مساحة الشقة هيزيد تكلفة التشطيب علشان هتزيد الخامات الي هنحتاجها زي الدهانات و البلاط و حاجة الكهرباء و السباكة تأسيس و تشطيب و كمية الأسمنت و الرمل، كل شركات و مكاتب التشطيب بتحدد تكلفة التشطيب بالمتر حسب مساحة الشقة و ده الي اتكلمنا عنه في كيفية حساب تكلفة تشطيب الشقة خطوة بخطوة
نصيحة " لما تيجي تحسب تكلفة التشطيب، أعرف مساحة الشقة أو البيت الي هتشطبه بالضبط علشان الحسابات متلخبطش معاك "
2- نوع التشطيب
التكلفة بتزيد أو بتقل علي حسب نوع التشطيب الي هتشطبه، أنواع التشطيب هي:
- تشطيب اقتصادي: ده أقل فئة في أنواع التشطيب و بتستخدم فيها أرخص الخامات في التشطيب
- تشطيب لوكس: ده الفئة المتوسطه في التشطيب بحيث بتجمع بين الجودة و التكلفة
- تشطيب سوبر لوكس: ده أعلي فئة في أنواع التشطيب و بتهتم بأعلي جودة فبتكون أعلي تكلفة
كل نوع من أنواع التشطيب ليه خامات مختلفة بمختلف الأسعار و العلامات التجارية
3- الخامات
الخامات أكبر عامل بيحددلك تكلفة التشطيب زي:
- السيراميك ولا الخشب: في فرق كبير في الأسعار بين المحلي و المستورد ده غير فرق السعر بين السيراميك و الخشب و البورسلين، ولو عايز تعرف الفرق بين السيراميك و الخشب اقرا المقال ده الخشب ولا السيراميك؟
- الدهانات: ماركت الدهانات بتفرق معانا في السعر، زي مثل جوتن أو GLC جوتن أغلي من GLC بس في نفس الوقت أعلي جودة
- الخشب: لما تبدأ في بند الخشب زي الأبواب و الشبابيك و التجاليد هتلافي فرق أسعار كبير جدا بين الخشب الطبيعي زي الزان و الأرو و الخشب الصناعي زي الكونتر و الMDF
نصيحة " حاول علي أد متقدر أنك توازن بين السعر و الجودة، و مش شرط أنك عايز أعلي جودة أنك كدة بتختار الأغلي، في بدايل لعلامات تجارية مشهورة بنفس الجودة بس بأسعار أقل "
4- مكان الشقة
هتلاقي فرق في سعر التشطيب علي حسب مكان الشقة، يعني مثلا:
- أسعار العمالة و الخامات في أماكن زي التجمع أو العاصمة أو الشروق هتبقي أغلي من لو المكان في أماكن زي مصر الجديدة و مدينة نصر و حدائق القبة أو محافظات تانيه غير القاهرة
- كمان لو الشقة في مكان بعيد مفيش فيه مواصلات، فالصناعية هيزودوا السعر علشان النقل هيبقي غالي عليهم
5- العمالة: صنايعي ولا شركة
اختيارك للعمالة بيفرق حسب:
- صنايعي مستقل: هيكون أرخص، بس هتضطر تتابعه بنفسك علشان جودة الشغل
- شركة تشطيب: هيكون أغلي، بس بتوفر عليك المجهود و هتضمنلك جودة الشغل
نصيحة " اسأل علي الصنايعي أو الشركة قبل متتعامل معاهم، و يفضل يكون حد تعرفه مجربهم قبل كدة "
6- السباكة و الكهرباء: مش شكل بس
في حجات اساسية في التشطيب زي:
- السباكة: خلي بالك وانت بتأسس سباكة من جودة المواسير و متنساش بعد ما الصنايعي يركب المواسير تكلم الشركة تيجي تختبر الخطوط و تكتبلك ضمان.
- الكهرباء: ده اكتر بند اوعي تسترخص فيه علشان تتجنب مشاكل الحريق و التلف، احسن شركة في التأسيس حاليا في مصر لسلك الكهرباء هي شركة السويدي، لازم تتأكد انك بتشتري من موزع معتمد للشركة علشان تتجنب الغش، و الخراطيم أفضل شركة مصطفي محمود، اما تشطيب الكهرباء زي المفاتيح و البرايز ففي شركات كتير زي فينوس و شنيدر.
7- التصميم الداخلي
لو هتجيب مصمم ديكور علشان يعملك تصميم للشقة ده هيزود التكلفة، بس هتلاقي في الأخر انه وفرلك تعديلات كتيره كنت هتعملها علي الشغل بعد متنفذه علشان معجبكش أو مطلعش زي مانت عايز، علشان المصمم بيخليك تشوف صور 3D للشقة قبل متتنفذ فتقدر تعدل علي التصميم من غير تكلفة، كمان المصمم بيساعدك في التصميم بحيث يكون مناسب للمزانية المحدده، و ممكن تتفق معاه يشتري معاك الخامات علشان خبراته و الأشراف علي التنفيذ.
نصيحة " لو هتشطب تشطيب اقتصادي متجبش مصمم ديكور و أعتمد علي نفسك و خد أفكار من علي الانترنت، ولو هتشطب تشطيب لوكس أو سوبر لوكس فالمصمم هيفيدك جدا "
8- مراحل التشطيب
أهم حاجة تخليك تتحكم في ميزانية التشطيب هي انك تقسم التشطيب لمراحل هما
1- السباكة و الكهرباء
2- الحوائط و الارضيات
3- الدهانات و الديكور و الاثاث
كدة تقدر تشتغل خطوة بخطوة و علي قد ميزانيتك
9- تغير الاسعار في السوق
خليك عامل حسابك في الميزانية انك تزود 10% احطياتي علشان تغير الاسعار في السوق، سواء أسعار الخامات أو العماله و الصنايعية أو حتي النقل
10- أهم النصائح لتوفير التكلفة
- متخليش الصنايعي يشتري الخامات، اشتريها انت بنفسك
- قارن بين أسعار الشركات أو الصنايعية قبل متختار
- استغل فترة الخصومات الي بتبقي علي الخامات زي معارض السيراميك
- اعمل خطة واضحة للتشطيب و امشي عليها
لو لسه عندك أسئلة أو محتاج مساعدة في حساب التكلفة، شاركنا رأيك أو اسأل، وإحنا هنا نساعدك! 😊