تشطيب البيت مش بس مجرد خطوة بعد متبني البيت, ده هو الفن الي بيحول الحوائط و الأسقف العاديه لتحفة فنية بتعبر عن ذوقك, مع التطور في عالم التشطيبات الديكورات بقا فيها تنوع و ابتكار سواء من ناحية الالوان أو الخامات أو الاضاءة و غيره, هنقولك علي نصائح عمليه تقدر من خلالها تخلي بيتك أشيك و أحلي و أفكار بتناسب أي ميزانية.
1- اختيار الألوان
الألوان مش بس مجرد ألوان علي الحوائط أو السقف, ده أول حاجه بتظهر في التصميم, علشان كدة لازم تختار الألوان المناسبة للتصميم و دايما أختار الألوان الي بتديك أحساس بالراحه و تكون منسجمه مع تفاصيل الديكور
الألوان نوعين:
الألوان النيتراز (Neutral)
زي الرمادي الفاتح و البيج و الأبيض و ده ألوان عصرية بتدي شعور بالهدوء و بتخلي المكان أوسع علشان كدة يفضل استخدامها في الأماكن الضيقة.
الألوان الجريئة
زي الأزرق الداكن و الأصفر الخردلي و الأخضر الزمردي و ده ممكن تستخدمها في حيطه مميزه أو للأثاث علشان تخلق نقطة جذب
لو أنت مش عامل تصميم 3D للبيت ممكن تستخدم تطبيق Dulux Visualizer أو Sherwin-Williams ColorSnap علشان تشوف الألوان علي الحوائط هتبقي عامله ازاي قبل تنفيذها.
2- الأضاءة
الاضاءة مش بس بتنور المكان, ده بتبرز جمال الديكورات و التصميم و بتخلق أجواء مختلفه
أنواع الاضاءة
- الاضاءة المخفية (Hidden Lighting): الاضاءة المثالية في الاسقف المعلقة أو بتكون خلف المراية
- السبوت لايتس: بتكون في السقف سواء سقف معلق أو لا و بنستخدمها لتسليط الضوء علي مناطق معينة أو قطعة معينه
- الماجنتيك تراك: ده بتبقي في الاسقف المعلقة و ميزتها أنها بتيح لينا أكتر من شكل ممكن نعمله بس بتبقي مكلفة شوية عن باقي الأنواع
- النجف المودرن: تصميمه بسيط و بنستخدمه لأضاءة أماكن كبيره زي الريسبشن
نصائح لاستخدام الاضاءة
- استخدم الاضاءة البيضاء في الاماكن العمليه زي المطبخ
- اختار الاضاءة الصفرا الدافئة في غرف النوم و المعيشة
- متنساش اضاءة الحديقة او البلكونة لو عندك مساحه خارجية و الاباليك اختيار كويس للمساحات الخارجية
3- اختيار خامات التشطيب
الخامات الي بتختارها للتشطيب بتفرق مش في الشكل بس في العمر الافتراضي و الجودة
أشهر الخامات
- الحوائط: أستخدم دهانات ضد المياه و ورق حائط ثلاثي الأبعاد
- الأرضيات
أستخدم البورسلين في المساحات الكبيرة
الباركيه أو الhdf مع المساحات الصغيرة و بيناسب التصميم المودرن و الكلاسيك
السيراميك خيار اقتصادي و عملي للمطابخ و الحمامات
- الأسقف: يفضل أستخدام الأسقف المعلقة بتصميمات هندسية مع أضاءة مدمجة لخلق مظهر فاخر
" لما تيجي تختار الخامات أختار الخامات المقاومة للرطوبة و البقع خصوصا في في المطابخ و الحمامات "
4- تصميم الأسقف
التصميمات الحديثة خلقت أبداع في ديكورتها خصوصا للأسقف
أنواع الأسقف هي:
الأسقف المعلقة
بتدي شكل أنيق و بتخفي أسلاك الكهرباء و تقدر من خلالها تنفذ اكتر من شكل في السقف نسفه و في الاضاءة
الأسقف الخشبية
بتناسب التصميم الكلاسيك و بتضيف لمسة دافئة و طبيعية خصوصا في غرف المعيشة
الأسقف المضيئة
التصميمات المضيئة بالكامل أو جزء منها بتعمل جو مستقبلي في المكان
أهم حاجة تحافظ علي تناسق الألوان مع باقي عناصر الديكور علشان تتجنب المبالغة
5- الاثاث و الاكسسوارات
الاثاث و الاكسسوارات هما اخر حاجه في التشطيب علشان كدة هما الي بيظهروا جمال التشطيب, اختار قطع تكون مناسبه للتصميم سواء مودرن أو كلاسيك أو نيو كلاسيك.
نصائح لاختيار الاثاث و الاكسسوارات
- اختار الاثاث متعدد الوظائف في المساحات الصغيره زي الكنبه السرير و الترابيزات الي بتتلم و بتتفرد
- أستخدم الارفف المعلقة علي انها جزء من الديكور و كوحدات تخزين
- استخدم سجاد بسيط و مخدات ملونة لخلق تباين بصري لو مكنش في تصميم للاثاث
6- استغلال المساحات الصغيرة بشكل ذكي
لو كانت مساحة الشقة او البيت بتاعتك صغيرة فلازم تختار تصميم ذكي يشتغل كل مساحة موجودة
زي
- استخدام المرايات علشان تدي شعور بالاتساع
- اختيار الاثاث البسيط و الديكورات الهادية و اتجنب الزحمة في الديكورات
- اعتمادك كله في الالوان علي الالوان الفاتحه علشان الالوان الفاتحة بتدي اتساع للمكان
- استخدم تصميمات و ابعد عن التصميمات الي فيها تفاصيل كتير و تخنق المكان
7- الجدران الفنية
الحوائط مش بس فواصل بين الغرف, ممكن تكون لوحة فنية لو الافكار ده:
- استخدام ورق الحائط ثلاثي الابعاد
- تركيب الواح خشبية ديكورية أو الواح pvc
- تعليق لوحة فنية كبيرة او صور عائلية بشكل منسق
نصائح اضافية للتشطيب
- التخطيط المسبق: يفضل انك تعمل تصميم حتي لو 2D قبل متبدأ تشطيب علشان تبقي عارف هتعمل ايه و هتبدأ ازاي و هيبقي معاك كل الأبعاد قبل متبدأ, و كمان انك تعمل تصميم و تعدل فيه أسهل و أحسن و أوفر من أنك تعدل علي شغل اتنفذ و معجبكش
- ميزانية محددة: حدد ميزانية قبل متبدأ و ألتزم بيها و وازن بين التكلفة و الجودة
- الاتجاهات الحديثة: دور دايما علي الجديد في عالم الديكور عن طريق انك تستعين بمهندس ديزاين هيوفر عليك مجهود كبير و هيوصلك لافضل نتيجة
الخلاصة
تشطيبات بيتك هي اللي بتعكس شخصيتك وذوقك، ومش شرط تكون مكلفة عشان تكون جميلة. ركز على التفاصيل الصغيرة، اختار خامات عالية الجودة، وابتعد عن المبالغة. الديكور العصري هو ببساطة الجمع بين الجمال والعملية بأسلوب مريح ومبتكر.
ابدأ دلوقتي وخلي حلم بيتك العصري حقيقة!